برافو .. شابة بقصبة تادلة دارت خدمة نقية بلاصة المغاربة ..طيحات معلم ومهندس السياقة في شر أعمالهما

خدمة نقية .. هادي واحد البنت في قصبة تادلة مشات بغا دوز إمتحان رخصة السياقة هما يطلبو ليها رشوة قدرها 300 درهم باش تضمن النجاح في البيرمي، ناض معلم السياقة قال ليها ضروري تجيبي معاك الفلوس باش تعطيها لمهندس السياقة إلا بغيتي تنجحي، البنت رفضات تعطي هاد المبلغ هو يحذرها أنها غادي تسقط الا معطات هاد الرشوة وخا تدوز جميع المراحل بشكل سليم، وأحسن حاجة دارت هاد البنت اتصلت بالرقم الأخضر التابع لرئاسة النيابة العامة والخبار وصلت لوكيل الملك بإبتدائية قصبة تادلة هما يديرو لهم واحد الكمين من طرف الشرطة القضائية حصل فيها معلم السياقة متلبسا بتسليم الرشوة، ملي دارو البحث معاه وقلبو تيلفون ديالو لقاوه طالبها من مرشحين اخرين باش ينجحو في البيرمي استدعوهم واكدو انهم كيطلبو منهم 300 درهم وكيعطوها لهم خافو لا يسقطهم، ملي جابو المهندس حتى هو دخلو الهاتف ديالو للخبرة لقاوه كيشد من رشاوي المترشحين 200 درهم وكيعطي لمعلم السياقة 100 درهم على كل مرشح، ملي تبت عليهم طلب وقبول الرشوة المحكمة حكمت عليهم بسنتين حبسا نافذا للمهندس وسنة واحد لمعلم السياقة تحياتي لهاد البنت دارت داكشي لي خاصو يتدار